O Museo de La Voz acolleu este mércores a entrega dos premios Voz Natura, o programa ambiental que desenvolve a Fundación Santiago Rey Fernández-Latorre. Nun ano especial, o do seu vixésimo quinta edición, galardoados de varios recunchos de Galicia compartiron nas instalacións de La Voz de Galicia un momento único no que se puxeron en valor os proxectos premiados, os mellores exemplos dun obxectivo compartido este ano por 365 centros, 75.000 alumnos e 3.500 profesores en Galicia: traballar por un futuro máis verde.

Todos os premios teñen en común unha idea de base, a importancia de coidar a natureza e ter uns firmes valores ambientais. Unha idea que se traduce en múltiples actividades de gran valor ecolóxico como coidar hortos, facer compost, limpar a contorna, preparar rutas, investigar sobre as velutinas, crear un herbario dixital ou un formigueiro e mesmo un proxecto con carafio.

Alejandro Díaz, o portavoz do comité científico, quere destacar que todos os centros «continúan realizando proxectos multidisciplinares, con vocación de continuidade, de acción directa sobre o medio, pero tamén de concienciación, e cada ano con máis rigor e ambición». O portavoz non oculta a súa satisfacción por proxectos como «as ecoauditorías e os proxectos que inclúen a pegada ecolóxica». Todo isto despois de 25 anos dedicados a «concienciar e implicar á comunidade escolar de Galicia na recuperación e defensa da natureza».

Dous anos despois, o reencontro

Non só porque o programa desenvolvido pola Fundación Santiago Rey Fernández-Latorre cumpre 25 anos nin porque La Voz de Galicia celebra os seus 140. A entrega de premios de onte foi unha cita moi especial tamén porque Voz Natura volveu xuntarnos tras dous anos mantendo as distancias. «Hoxe, por fin, volvémonos xuntar todos neste ano precioso da volta á normalidade», afirmaba Loreto Silvoso, que presentou o acto xunto a Antía Díaz-Leal.

A ilusión palpábase no ambiente. E nas caras dos máis pequenos, premiados xa polos seus traballados proxectos, pegadas para un obxectivo que se fai grande cada ano. Eles estaban máis pendentes de Terri, a mascota de Voz Natura, que, como dixo Loreto, «nunca falta á cita», e paseouse saudando aos participantes.Pequenos e maiores aplaudiron con efusividad aos galardoados cando subiron ao escenario a recoller os seus premios da man dos representantes de Gadisa, Alcoa, El Corte Inglés, a Deputación da Coruña, a Consellería de Medio Ambiente e La Voz de Galicia.

E o gran premio Galicia entregouno o presidente da Xunta, Alfonso Rueda, que compartiu despois petiscos e impresións cos participantes, que non dubidaron en pedirlle varios selfis. Os que os conseguían, despois, presumían orgullosos. Igual de orgulloso estaba José Antonio Díaz, un dos máis famosos e veteranos membros do comité científico, que viu nacer hai 25 anos unha ilusión que hoxe comproba que cumpriu co seu obxectivo: sementar nos máis novos a semente do coidado dun planeta que, hoxe, máis que nunca, necesítaos.